മമ്മൂട്ടി അഭിനയം നിര്‍ത്തി ഗള്‍ഫില്‍ വീഡിയോ റാഫയുടെ മാര്‍ക്കറ്റിംഗ് മാനേജരാവാന്‍ തീരുമാനിച്ചിരുന്നു-ജൂബിലി ജോയി തോമസ്.

കൊച്ചി: മമ്മൂട്ടി അഭിനയം നിര്‍ത്തി ഗള്‍ഫില്‍ പോയി വീഡിയോ റാഫയുടെ മാര്‍ക്കറ്റിംഗ് മാനേജരാവാന്‍ തീരുമാനിച്ചിരുന്നുവെന്ന് പ്രമുഖ നിര്‍മ്മാതാവ് ജൂബിലി ജോയിതോമസ്.

സഫാരി ടിവിയിലെ ചരിത്രം എന്നിലൂടെ പരിപാടിയില്‍ സംസാരിക്കവെയാണ് അദ്ദേഹം ഇക്കാര്യം വെളിപ്പെടുത്തിയത്.

മമ്മൂട്ടി ഒരേ ടൈപ്പ് കഥാപാത്രങ്ങളെ അവതരിപ്പിച്ച് പ്രേക്ഷകര്‍ക്ക് മടുപ്പ് അനുഭവപ്പെടുകയും പോസറ്ററുകളില്‍ ചാണകം തേക്കുകയും ചെയ്ത ഘട്ടത്തിലാണ് ജൂബിലി ന്യൂഡെല്‍ഹി എന്ന സിനിമ ചെയ്യാന്‍ തീരുമാനിച്ചതെന്നും അദ്ദേഹം പറഞ്ഞു.

തനിക്ക് നേരത്തെ മമ്മൂട്ടി ചിത്രങ്ങളിലൂടെ വലിയ സാമ്പത്തിക നേട്ടം ഉണ്ടായതിനെ തുടര്‍ന്നാണ് പണം പോയാല്‍ പോകട്ടെ എന്നുകരുതി ന്യൂഡെല്‍ഹി നിര്‍മ്മിക്കാന്‍ തീരുമാനിച്ചതെന്നും ജോയി തോമസ് വെളിപ്പെടുത്തി.

നേട്ടങ്ങള്‍ ഉണ്ടാക്കിതന്നവര്‍ക്ക് ഒരു മോശം സമയം വരുമ്പോല്‍ കൂടെ നില്‍ക്കണമെന്നതിനാലാണ് ന്യൂഡെല്‍ഹി ഒരുക്കിയതെന്നും അതിന്റെ വന്‍വിജയമാണ് മമ്മൂട്ടിയുടെ പിന്നീടുള്ള നേട്ടങ്ങള്‍ക്ക് കാരണമായതെന്നും ജോയി തോമസ് പറഞ്ഞു.