നമ്പര്‍ പ്ലേറ്റുകള്‍ മറച്ചുവെച്ച് ടിപ്പറുകളുടെ മരണപ്പാച്ചില്‍
തളിപ്പറമ്പ്: നമ്പര്‍ പ്ലേറ്റുകള്‍ മറച്ചുവെച്ച് ടിപ്പര്‍ലോറികളുടെ മരണപ്പാച്ചില്‍.
കുറുമാത്തൂര്‍-ബാവുപ്പറമ്പ്-പറശിനിക്കടവ് മേഖലകളിലാണ് ടിപ്പര്‍ ലോറികള്‍ ഇത്തരത്തില്‍ നമ്പര്‍ മറച്ചുവെച്ച് ശരവേഗത്തില്‍ പായുന്നത്.
വാഹനത്തിന്റെ നാല് വശങ്ങളിലും പെട്ടെന്ന് കാണുന്ന വിധത്തില്‍ നമ്പര്‍ എഴുതണമെന്ന നിയമം ഇവിടെ പാലിക്കപ്പെടുന്നില്ല.
ഈ പ്രദേശങ്ങളിലെ ചെങ്കല്‍ ക്വാറികളില്‍ നിന്നുള്ള ലോറികളാണ് ബാവുപ്പറമ്പ്-കോള്‍മൊട്ട-പറശിനിക്കടവ് റോഡ് വഴി യാത്രക്കാരുടെ ജീവന് ഭീഷണിയായി സര്‍വീസ് നടത്തുന്നത്.
പിന്‍ഭാഗത്തെ നമ്പര്‍ പ്ലേറ്റുകളെ മറച്ചുകൊണ്ട് സ്ഥാപിച്ച ബീമുകള്‍ക്കുള്ളിലായതിനാല്‍ വണ്ടി നമ്പര്‍ ആര്‍ക്കും കാണാനാവില്ല.
ഉള്ള ബോര്‍ഡ് തന്നെ ചെളിയടിച്ച് നമ്പര്‍ കാണാത്ത വിധത്തിലാക്കിയിട്ടുണ്ട്.
മോട്ടോര്‍ വാഹനവകുപ്പോ പോലീസോ ഇത്തരക്കാരെ പരിശോധിക്കാന്‍ മടിക്കുന്നത് കാരണമാണ് നിയമലംഘനങ്ങള്‍ കൂടുന്നത്.
എന്തെങ്കിലും അപകടം സംഭവിച്ചാല്‍ വണ്ടിനമ്പര്‍ തിരിച്ചറിയാതെ പെട്ടെന്ന് രക്ഷപ്പെടാനാണ് ഇത്തരം തന്ത്രങ്ങള്‍ പയറ്റുന്നതെന്ന് നാട്ടുകാര്‍ പറയുന്നു.