കടന്നപ്പള്ളിയും ഗണേശനും ഡിസംബറില്‍ മന്ത്രിമാര്‍.
തിരുവനന്തപുരം: സംസ്ഥാനത്ത് മന്ത്രിസഭാ പുനഃസംഘടന ഡിസംബര്‍ അവസാനം നടക്കും.
എല്‍ഡിഎഫ് കണ്‍വീനര്‍ ഇ.പി.ജയരാജനാണ് ഇക്കാര്യം വ്യക്തമാക്കിയത്.
നവ കേരള സദസ് കഴിയുന്ന മുറയ്ക്കായിരിക്കും പുനഃസംഘടന.
അഹമ്മദ് ദേവര്‍കോവിലിനു പകരം കടന്നപ്പള്ളിയും ആന്റണി രാജുവിന് പകരം കെ.ബി.ഗണേഷ് കുമാറുമായിരിക്കും പുതിയതായി എത്തുക.
നവംബര്‍ 18 മുതലാണ് നവകേരള സദസ്. ഡിസംബര്‍ 24 വരെ ഇത് നീണ്ടു നില്‍ക്കും. ശേഷമായിരിക്കും പുനഃസംഘടന.
മുന്നണിയിലെ നാല് ഘടക കക്ഷികള്‍ക്ക് രണ്ടര വര്‍ഷം വീതം മന്ത്രിസ്ഥാനം നല്‍കാനായിരുന്നു തീരുമാനം.
നിലവിലെ മന്ത്രിമാരുടെ രണ്ടര വര്‍ഷമെന്ന കാലാവധി നവംബര്‍ 20നു പൂര്‍ത്തിയാകും.
കേരളത്തോടുള്ള കേന്ദ്ര അവഗണനയ്‌ക്കെതിരെ ദേശീയ, സംസ്ഥാന തലങ്ങളില്‍ പ്രതിഷേധം സംഘടിപ്പിക്കാനും നേരത്തെ തീരുമാനമായിരുന്നു.
ദേശീയ തലത്തില്‍ ഡല്‍ഹിയില്‍ പ്രക്ഷോഭം സംഘടിപ്പിക്കും.
മുഖ്യമന്ത്രിയും മന്ത്രിമാരും ജനപ്രതിനിധികളും പങ്കെടുക്കുമെന്ന് ജയരാജന്‍ വ്യക്തമാക്കി.