ഒരു മൂലധനശക്തിക്ക് മുന്നിലും കീഴടങ്ങില്ല; ദൗത്യം തുടരും.
പ്രിയപ്പെട്ട കണ്ണൂര്‍ ഓണ്‍ലൈന്‍ന്യൂസ് ബന്ധുക്കളേ,
കണ്ണൂര്‍ ഓണ്‍ലൈന്‍ന്യൂസ് പ്രവര്‍ത്തനം തുടങ്ങിയിട്ട് ഏഴ് വര്‍ഷം പിന്നിട്ടിരിക്കയാണ്. വാര്‍ത്തകളിലെ വാസ്തവങ്ങള്‍ മറയില്ലാതെ എന്ന ഞങ്ങളുടെ ടാഗ്‌ലൈന്‍ അതിന്റെ ഗൗരവം ഉള്‍ക്കൊണ്ട് പ്രാവര്‍ത്തികമാക്കാന്‍ ശ്രമിച്ചതിന്റെ നേട്ടമെന്നോണം ഒരു ലക്ഷത്തിലേറെ വായനക്കാരുള്ള കേരളത്തിലെ ഏറ്റവും മികച്ച ഓണ്‍ലൈന്‍ വാര്‍ത്താ പോര്‍ട്ടലായി ഉയരാന്‍ സാധിച്ചതിന്റെ കടപ്പാട് വായനക്കാരോട് മാത്രമാണ്. മൂലധനശക്തികളുടെ ദല്ലാളന്‍മാര്‍ ഓണ്‍ലൈന്‍ ന്യൂസിനെതിരെ ഒളിഞ്ഞും തെളിഞ്ഞും പ്രവര്‍ത്തിക്കാന്‍ തുടങ്ങിയിട്ടും നാളുകളേറെയായി. ദല്ലാളന്‍മാരുടെ എര്‍ത്തുകളായി പ്രവര്‍ത്തിക്കുന്ന ചില ഫോട്ടോസ്റ്റാറ്റ് മാധ്യമപ്രവര്‍ത്തകരും ഞങ്ങള്‍ക്കെതിരെയുണ്ട്. ഇവരുടെയെല്ലാം വെല്ലുവിളികള്‍ ഏറ്റെടുക്കാനുള്ള കരുത്ത് വായനക്കാര്‍ തന്നെയാണ്. ഒരു മൂലധനശക്തിയുടേയും ഒരു ദല്ലാളിന്റെയും, വളഞ്ഞിട്ട് ആക്രമിക്കുന്ന ഫോട്ടോസ്റ്റാറ്റ് മാധ്യമ പ്രവര്‍ത്തകരുടെയും മുന്നില്‍ മുട്ടുമടക്കില്ല-നിങ്ങള്‍ക്ക് മുന്നില്‍ കീഴടങ്ങില്ല. കണ്ണൂര്‍ ഓണ്‍ലൈന്‍ന്യൂസ് ജനപക്ഷം ചേര്‍ന്നുകൊണ്ടുള്ള മാധ്യമപ്രവര്‍ത്തനം തുടരും.
ഓണ്‍ലൈന്‍ന്യൂസ് കൂടുതല്‍ സജീവമാക്കുന്നതിന്റെ ഭാഗമായി ഒരു ക്രൈംനോവല്‍ അടുത്തുതന്നെ പ്രസിദ്ധീകരിച്ചുതുടങ്ങും. യുവ എഴുത്തുകാരന്‍ മുനീം കപ്പോത്ത് എഴുതിയ ഗുഗ്ഗുലു നാട്ടിലെ അധോലോക പയ്യന്‍ എന്ന ക്രൈം നോവലാണ് പ്രസിദ്ധീകരിക്കുന്നത്. എല്ലാ വായനക്കാരുടേയും സഹായ സഹകരണങ്ങള്‍ പ്രതീക്ഷിക്കുന്നു.