മാവോയിസ്റ്റ് സുരേഷിനെ കോഴിക്കോടേക്ക് മാറ്റും.
പരിയാരം: മാവോയിസ്റ്റ് സുരേഷിനെ കോഴിക്കോട് മെഡിക്കല്‍ കോളേജിലേക്ക് മാറ്റും. കാട്ടാനയുടെ കുത്തേറ്റ് ഗുരുതര പരിക്കുകളോടെ പരിയാരത്തെ കണ്ണൂര്‍ ഗവ.മെഡിക്കല്‍ കോളേജില്‍ കഴിയുന്ന ചിക്മംഗളൂരു സ്വദേശി സുരേഷിനെയാണ് പരിയാരത്തുനിന്നും കോഴിക്കോടേക്ക് മാറ്റാന്‍ തീരുമാനിച്ചിരിക്കുന്നത്.
വെള്ളിയാഴ്ച്ച രാത്രി പരിയാരത്തേക്ക് കൊണ്ടുവന്ന സുരേഷിന്റെ ഇടതുകാല്‍ പഴുപ്പ് ബാധിച്ച നിലയിലാണ്.
അതുകൊണ്ടുതന്നെ ശസ്ത്രക്രിയ നടത്താന്‍ സാധിക്കാത്ത അവസ്ഥയാണെന്ന് മെഡിക്കല്‍ കോളേജ് അധികൃതര്‍ പറയുന്നു. നെഞ്ചിലെ നീര്‍ക്കെട്ടും മറ്റും ഭേദമായിട്ടുണ്ടെങ്കിലും കാലിലെ പരിക്ക് ഗുരുതരനിലയിലാണ്.
തണ്ടര്‍ബോള്‍ട്ട് ഉള്‍പ്പെടെയുള്ള പോലീസുകാരുടെ സാന്നിധ്യം മെഡിക്കല്‍ കോളേജിലെത്തുന്ന മറ്റ് രോഗികള്‍ക്കും ബന്ധുക്കള്‍ക്കും ബുദ്ധിമുട്ടായി തീര്‍ന്നതാണ് സുരേഷിനെ കോഴിക്കോട്ടേക്ക് മാറ്റാന്‍ പോലീസ് ആലോചിക്കാന്‍ കാരണമെന്നാണ് വിവരം.
ഇന്ന് വൈകുന്നേരമോ രാത്രിയിലോ കോഴിക്കോട്ടേക്ക് മാറ്റുമെന്നാണ് ലഭിക്കുന്ന വിവരം.