പരിയാരം: പരിയാരത്തെ കണ്ണൂര്‍ ഗവ. ആയുര്‍വേദ കോളേജില്‍ നിര്‍മിച്ച പുതിയ ലേഡീസ് ഹോസ്റ്റല്‍ ആരോഗ്യ, വനിതശിശുവികസന വകുപ്പ് മന്ത്രി വീണാ ജോര്‍ജ്ജ് ഓണ്‍ലൈനായി ഉദ്ഘാടനം ചെയ്തു.
സര്‍ക്കാര്‍ പദ്ധതി വിഹിതത്തില്‍ നിന്ന് 6.62 കോടി ചെലവില്‍ നിര്‍മ്മിക്കുന്ന മൂന്ന് നിലകളുള്ള ലേഡീസ് ഹോസ്റ്റലിന്റെ താഴത്തെ നിലയുടെ ഉദ്ഘാടനവും ഒന്നാം നിലയുടെ നിര്‍മ്മാണോദ്ഘാടനവുമാണ് നടത്തിയത്.
എം വിജിന്‍ എം എല്‍ എ ശിലാഫലകം അനാച്ഛാദനം ചെയ്തു. നിര്‍മ്മാണം പൂര്‍ത്തിയായ ഒന്നാം നിലയ്ക്ക് 741.98 ച.മീറ്റര്‍ വിസ്തൃതിയുണ്ട്.
ലോബി, ഡൈനിംഗ് ഹാള്‍, വിദ്യാര്‍ഥിനികള്‍ക്കുള്ള 15 മുറികള്‍, ഗസ്റ്റ് റൂം, വാര്‍ഡന്‍ റൂം കെട്ടിടത്തിന്റെ ഇരുഭാഗത്തുമായി ടോയ്‌ലറ്റുകള്‍ എന്നീ സൗകര്യങ്ങളാണുളളത്.
പുതുതായി നിര്‍മ്മിക്കേണ്ട രണ്ടാംനിലയില്‍ വിദ്യാര്‍ഥിനികള്‍ക്കുള്ള 19 മുറികള്‍, സ്റ്റഡി റൂം, കെട്ടിടത്തിന്റെ ഇരുഭാഗത്തുമായി ടോയ്‌ലറ്റുകള്‍ തുടങ്ങിയ സൗകര്യങ്ങളുണ്ട്.
കണ്ണൂര്‍ ഗവ. ആയുര്‍വേദ കോളേജില്‍ വിവിധ കോഴ്‌സുകളില്‍ പഠനം നടത്തുന്ന 450ല്‍ 360 പേരും പെണ്‍കുട്ടികളാണ്.
നിലവിലെ ലേഡീസ് ഹോസ്റ്റലില്‍ 200 ലധികം പെണ്‍കുട്ടികള്‍ താമസിക്കുന്നുണ്ട്.
പുതിയ ഹോസ്റ്റലിന്റെ താഴത്തെ നിലയിലെ 16 മുറികള്‍ അന്‍പതിലധികം വിദ്യാര്‍ഥിനികളുടെ താമസത്തിന് സൗകര്യപ്പെടും.
മൂന്നു നിലയുള്ള പുതിയ ഹോസ്റ്റലിന്റെ പ്രവൃത്തി പൂര്‍ത്തിയായാല്‍ മുഴുവന്‍ ബി എ എം എസ് വിദ്യാര്‍ഥിനികള്‍ക്കും താമസിക്കാന്‍ സാധിക്കും.
എം.വിജിന്‍ എം എല്‍ എ അധ്യക്ഷത വഹിച്ചു. കടന്നപ്പള്ളിപാണപ്പുഴ പഞ്ചായത്ത് പ്രസിഡണ്ട് ടി.സുലജ, മുന്‍ എംഎല്‍എ ടി.വി.രാജേഷ്, വാര്‍ഡ് മെമ്പര്‍ വി.എ.കോമളവല്ലി,
കോളേജ് പ്രിന്‍സിപ്പല്‍ ഡോ.സി.സിന്ധു, ആയുഷ്മിഷന്‍ ജില്ലാ പ്രോഗ്രാം മാനേജര്‍ കെ.സി.അജിത് കുമാര്‍, ലേഡീസ് ഹോസ്റ്റല്‍ ഡെപ്യൂട്ടി വാര്‍ഡന്‍ ഡോ.കെ.അജിത,
എച്ച്ഡിഎസ് അംഗങ്ങളായ കെ.പത്മനാഭന്‍, കെ.പി.ജനാര്‍ദനന്‍, പി.പി.ദാമോദരന്‍, കെ.വി.ബാബു, ടി.കെ.ശങ്കരന്‍ കൈതപ്രം, ടി രാജന്‍, പി ടി എ പ്രസിഡണ്ട് കെ പി രമേശന്‍ തുടങ്ങിയവര്‍ സംബന്ധിച്ചു.
