മെഡിക്കല്‍ കോളേജ് ജീവനക്കാരുടെ സ്വകാര്യ സംരംഭങ്ങളേക്കുറിച്ച് അന്വേഷണം-
പരിയാരം: കണ്ണൂര്‍ ഗവ.മെഡിക്കല്‍ കോളേജിലെ ചില ജീവനക്കാര്‍ സ്വകാര്യ സംരംഭങ്ങള്‍ ആരംഭിച്ചതിനെതിരെ അന്വേഷണം നടക്കുന്നതായി സൂചന.
മെഡിക്കല്‍ കോളേജില്‍ ജോലി ചെയ്യുന്നതോടൊപ്പം മെഡിക്കല്‍ കോളേജ് പരിസരത്ത് തന്നെ സൂപ്പര്‍മാര്‍ക്കറ്റുകള്‍, ജില്ലക്കകത്തും പുറത്തുമുള്ള ചിലയിടങ്ങളില്‍ മെഡിക്കല്‍ ലാബുകള്‍ അടക്കമുളള്ള
സ്ഥാപനങ്ങള്‍ ആരംഭിക്കുകയും നടത്തിക്കൊണ്ടുപോകുകയും ചെയ്യുന്നതായി ഉന്നതങ്ങളില്‍ പരാതികള്‍ ലഭിച്ചതിന്റെ അടിസ്ഥാനത്തിലാണ് അന്വേഷണം.
വിരലിലെണ്ണാവുന്ന ചിലരാണ് ഇത്തരം സംരംഭങ്ങള്‍ ആരംഭിക്കുകയും മെഡിക്കല്‍ കോളേജില്‍ നിന്ന് രോഗികളേയും
ജീവനക്കാരെയും കാന്‍വാസ് ചെയ്ത് കച്ചവടം സജീവമാക്കുകയും ചെയ്തിരിക്കുന്നതെന്നാണ് വിജിലന്‍സ് ഉള്‍പ്പടെയുള്ള ഉന്നത കേന്ദ്രങ്ങളില്‍ ലഭിച്ച പരാതികളില്‍ പറയുന്നത്.
ഡോക്ടര്‍മാരുടെ സ്വകാര്യ പ്രാക്ടീസിനെതിരെ വടിയെടുത്ത അധികൃതര്‍ ഇത്തരം ഇടപാടുകള്‍ കാണുന്നില്ലെന്ന് ചില ജീവനക്കാര്‍ തന്നെ പരാതിപ്പെടുന്നുണ്ട്.