പി.ടി.ജോസ് വീണ്ടും കേരളാ കോണ്ഗ്രസ്(എം)വേദിയില്-മനുഷ്യത്വമുള്ളവര്ക്കേ നന്ദിയുണ്ടാകൂ എന്ന ഒളിയമ്പും—
തളിപ്പറമ്പ്: മനുഷ്യത്വമുള്ളവര്ക്ക് മാത്രമേ നന്ദിയുണ്ടാവുകയുള്ളൂവെന്ന് കേരളാ കോണ്ഗ്രസ് നേതാവ് പി.ടി.ജോസ്.
സഹായിച്ചവരില് പലര്ക്കും നന്ദിയില്ലെന്നും, എന്നാല് അത്തരത്തില് ഒരാളായിരുന്നില്ല ജോര്ജ് മേച്ചേരിയെന്നും പി.ടി.ജോസ്.
കേരളാ കോണ്ഗ്രസ് (എം) സംഘടിപ്പിച്ച അഡ്വ. ജോര്ജ് മേച്ചേരി അനുസ്മരണ സമ്മേളനത്തില് വെച്ചാണ് തന്റെ കൂടെ നിന്നിരുന്ന പ്രമുഖ നേതാക്കളെ വേദിയിലിരുത്തിക്കൊണ്ട് അദ്ദേഹം ഇത് പറഞ്ഞത്.
ജോര്ജ് മേച്ചേരി മനുഷ്യത്വവും നന്ദിയും ഉള്ളയാളാണെന്ന് ഉദാഹരണ സഹിതം ചൂണ്ടിക്കാട്ടിയായിരുന്നു പി.ടി.ജോസിന്റെ പ്രസംഗം.
ഒരു വര്ഷത്തിന് ശേഷമാണ് പി.ടി.ജോസ് വീണ്ടും കേരളാ കോണ്ഗ്രസ് (എം) വേദിയില് എത്തുന്നത്.
പരേതനായ കേരളാ കോണ്ഗ്രസ് നേതാവും ലോയേഴ്സ് കോണ്ഗ്രസ് സംസ്ഥാന സെക്രട്ടറിയുമായ അഡ്വ.ജോര്ജ് മേച്ചേരി അനുസ്മരണ സമ്മേളനത്തിലാണ് വീണ്ടും പി.ടി.ജോസ് എത്തിയത്.
സദസില് ഇരുന്ന ജോസിനെ മന്ത്രി റോഷി അഗസ്റ്റിനാണ് വേദിയിലേക്ക് വിളിച്ച് തൊട്ടടുത്ത് ഇരുത്തിയത്.
രാജ്യസഭാ എം.പി. സ്ഥാനം കിട്ടാതിരുന്നതിനെ തുടര്ന്നാണ് നേതൃത്വവുമായി തെറ്റിയ പി.ടി.ജോസ് മാറി നിന്നതും കെ.എം.മാണിയുടെ ചരമവാര്ഷിക ദിനത്തില് പ്രത്യേക പരിപാടി സംഘടിപ്പിച്ച് നേതൃത്വത്തെ വെല്ലുവിളിച്ചതും വലിയ വാര്ത്തകളായിരുന്നു.
പാര്ട്ടി ചെയര്മാന് ജോസ് കെ.മാണി കണ്ണൂരില് വന്നപ്പോഴൊന്നും പി.ടിയെ കാണാനോ സംസാരിക്കാനോ തയ്യാറായിരുന്നില്ല.
പി.ടി.ജോസ് എന്ന വാക്ക്പോലും പറയാതെയായിരുന്നു അദ്ദേഹം പത്രസമ്മേളനത്തില് സംസാരിച്ചിരുന്നത്.
പി.ടിയോടൊപ്പമുണ്ടായിരുന്ന ജോയിസ് പുത്തന്പുര ഉള്പ്പെടെയുള്ള നേതാക്കള് അദ്ദേഹവുമായി അകന്നുനിന്നത് പി.ടി.ക്ക് തിരിച്ചടിയായിുരുന്നു.
പി.ടി.ജോസ് വീണ്ടും കേരളാ കോണ്ഗ്രസ് (എം)ല് സജീവമാകുമെന്നതിന്റെ സൂചനയായാണ് ഇന്നത്തെ യോഗത്തില് പങ്കെടുത്തതിനെ കണക്കാക്കുന്നത്.
പി.ടി.യുമായി വ്യക്തിബന്ധമുള്ള വായാട്ടുപറമ്പ് സ്വദേശിയായ ഒരു മുന് മാധ്യമ സ്ഥാപന തലവനാണ് പി.ടിയേയും നേതൃത്വത്തേയും വീണ്ടും ഒന്നിപ്പിക്കാനുള്ള ശ്രമങ്ങള്ക്ക് പിന്നിലെന്നാണ് സൂചന.
പക്ഷെ, പി.ടി യുടെ വരവ് ഭൂരിപക്ഷം പ്രവര്ത്തകര്ക്കും അത്ര ദഹിച്ചിട്ടില്ലെന്നാണ് സദസില് നിന്നുള്ള ചില കമന്റുകള് വെളിവാക്കുന്നത്.