കരിമ്പത്ത് നിന്ന് ചന്ദനമരം മോഷ്ടിച്ച മൂന്നുപേര്‍ അറസ്റ്റില്‍-
തളിപ്പറമ്പ്: കരിമ്പത്ത് നിന്നും ചന്ദനം മോഷ്ടിച്ച സംഭവത്തില്‍ ജില്ലയിലെ കുപ്രസിദ്ധ ചന്ദന മോഷ്ടാക്കള്‍ പിടിയില്‍.
ശിവപുരം വെമ്പടിത്തട്ടിലെ സുമേഷ് നിവാസില്‍ എ.സുധീഷ്(34), ശിവപുരം പാങ്കുളത്ത് വീട്ടില്‍ വിജേഷ്(35), പടുപാറ ഷീന നിവാസില്‍ കെ.ഷിജു(38) എന്നിവരെയാണ് പിടികൂടിയത്.
കഴിഞ്ഞ ജൂലായ് 6 ന് പുലര്‍ച്ചെ 3 മണിയോടെ നെല്ല്യാട് എ.കെ.ജി-ഇ.എം.എസ് റോഡിലെ ത്രിശക്തിയില്‍ ഇ.നിശാന്തിന്റെ വീട്ടുവളപ്പില്‍ നിന്നും ഇവര്‍ ചന്ദനമരം മോഷ്ടിച്ചിരുന്നു.
17 ന് മാതമംഗലം ഭാഗത്ത് ചന്ദനം മോഷ്ടിക്കാനായി എത്തിയ ഇവര്‍ പറ്റിയ മരം കണ്ടെത്താന്‍ കഴിയാതെ തിരിച്ചുവരുന്ന വഴി കരിമ്പം പാലത്തിന് സമീപത്തെ ചെങ്കല്‍പണയുടെ സമീപത്തെ ചന്ദനം മുറിച്ചെടുത്ത് നാല് കഷണങ്ങളാക്കി കെ.എല്‍-58 എന്‍-4584 നമ്പര്‍ കാറില്‍ കടത്തുന്നതിനിടെയാണ് പിണറായി എസ്.ഐ ബി.എസ്.ബാവിഷിന്റെ നേതൃത്വത്തിലുള്ള പോലീസ് സംഘം ഇവരെ പിടികൂടിയത്.
കരിമ്പത്തുനിന്നും മൈലുള്ളിമൊട്ടയില്‍ നിന്നും മോഷ്ടിച്ച 9 ചന്ദനമുട്ടികള്‍ ഇവരില്‍ നിന്ന് പോലീസ് പിടിച്ചെടുത്തു.
പിണറായി പോലീസ് ചോദ്യം ചെയ്യുന്നതിനിടെയാണ് കരിമ്പത്തെ മോഷണം ഇവര്‍ സമ്മതിച്ചത്.
പകല്‍ ചന്ദനമരം കണ്ടുവെക്കുകയും രാത്രിയിലെത്തി മോഷ്ടിക്കുകയുമാണ് ഇവരുടെ രീതിയെന്ന് പോലീസ് പറഞ്ഞു.
മൈലുള്ളിമൊട്ടയിലെ വീട്ടില്‍ ചന്ദനമരം വില്‍ക്കുമോ എന്ന് ചോദിച്ച് ഇവര്‍ എത്തിയിരുന്നു.
അന്ന് രാത്രിയാണ് മോഷണം നടത്തിയത്. നേരത്തെ വനംവകുപ്പ് അധികൃതകരും ഇവരെ പിടികൂടിയിരുന്നു.
ഇവരുടെ കാറില്‍ നിന്ന് കത്ത്യാള്‍, ആക്‌സോ ബ്ലേഡ്, അറക്കവാള്‍ എന്നിവയും പോലീസ് പിടിച്ചെടുത്തിരുന്നു.
കരിമ്പത്തെ മോഷണം തളിപ്പറമ്പ് സ്റ്റേഷന്‍ പരിധിയിലായതിനാലാണ് കേസ് ഇങ്ങോട്ടേക്ക് കൈമാറിയത്.