തിരുവട്ടൂര്‍ ശിവക്ഷേത്രത്തില്‍ പുനപ്രതിഷ്ഠാകര്‍മ്മങ്ങള്‍ തുടങ്ങി, ഇന്ന് വിഗ്രഹഘോഷയാത്ര.
തളിപ്പറമ്പ്: തിരുവട്ടൂര്‍ ശ്രീശിവക്ഷേത്രം, മഹാവിഷ്ണുക്ഷേത്രം(നരസിംഹമൂര്‍ത്തി)പുന:പ്രതിഷ്ഠാ കര്‍മ്മങ്ങളുടെ ഭാഗമായി ഇന്ന് വൈകുന്നേരം വിഗ്രഹഘോഷയാത്രനടക്കും.
ഏപ്രില്‍ ഒന്നു മുതല്‍ ഒന്‍പതുവരെയാണ് ആഘോഷപരിപാടികള്‍.
ഏകദേശം 2000 വര്‍ഷത്തെ പഴക്കമുണ്ടെന്ന് കരുതുന്ന ക്ഷേത്രത്തിന്റെ പുനരുദ്ധാരണ പ്രവര്‍ത്തനങ്ങളുടെ ഭാഗമായി പൂര്‍ത്തീകരിച്ച മഹാവിഷ്ണുക്ഷേത്രത്തിന്റെ(നരസിംഹമൂര്‍ത്തി)പുനപ്രതിഷ്ഠാകര്‍മ്മം തന്ത്രി കോട്ടോല്‍ ഇല്ലത്ത് മഹേശ്വരന്‍ നമ്പൂതിരിയുടെ മുഖ്യ കാര്‍മ്മികത്വത്തിലാണ് നടക്കുക.
ഇന്ന് വൈകുന്നേരം മൂന്നിന് വായാട് ഗണപതി ക്ഷേത്രത്തില്‍ നിന്നും വിഗ്രഹഘോഷയാത്രയും തന്ത്രിമാരുടെ ആചാര്യവരണവും നടക്കും.
ഏപ്രില്‍ 6, 7, 8 തീയതികളില്‍ വൈകുന്നേരം 7 ന് തായമ്പക. ഏപ്രില്‍ 9 ന് ദീപാരാധനക്ക് ശേഷം പാണ്ടിമേളവും തുടര്‍ന്ന്, ദേവനര്‍ത്തകരായ
പുതുമന ശങ്കരന്‍ നമ്പൂതിരി, പെരിങ്ങോം കൃഷ്ണന്‍ നമ്പൂതിരി എന്നിവരുടെ ഇരട്ട തിടമ്പ് നൃത്തം. ശേഷം അത്താഴപൂജയോടെ ആഘോഷപരിപാടികള്‍ സമാപിക്കും.