ചാവശേരിയില്‍ ഇരുചക്ര വാഹനങ്ങള്‍ കൂട്ടിയിടിച്ച് ഒരാള്‍ മരിച്ചു
മട്ടന്നൂര്‍: ചാവശേരിയില്‍ ഇരുചക്ര വാഹനങ്ങള്‍ കൂട്ടിയിടിച്ച് ഒരാള്‍ മരിച്ചു, ഒരാള്‍ക്ക് പരിക്ക്.
വെളിയമ്പ്ര പറയാനാട് സ്വദേശി കെ.സദാശിവന്‍ (55)ആണ് മരിച്ചത്.
സ്‌കൂട്ടറില്‍ ഉണ്ടായിരുന്ന ദേവര്‍കാട് സ്വദേശിയെ പരിക്കുകളോടെ ആശുപത്രിയില്‍ പ്രവേശിപ്പിച്ചു.
ശനിയാഴ്ച വൈകുന്നേരം മൂന്നു മണിയോടെ ചാവശേരി പള്ളിക്ക് എതിര്‍വശത്തായായിരുന്നു അപകടം.
ചാവശേരി ഗ്രാമീണ ബാങ്ക് കലക്ഷന്‍ ഏജന്റാണ് സദാശിവന്‍.
ഇരിട്ടി ഭാഗത്തു നിന്നും മട്ടന്നൂര്‍ ഭാഗത്ത് ചാവശേരി ടൗണില്‍ കളക്ഷന്‍ എടുക്കാന്‍ വരുന്നതിനിടെയാണ് അപകടം ഉണ്ടായത്.
സദാശിവന്‍ സമീപത്തെ കടയിലേക്ക് കയറാന്‍ ശ്രമിക്കുന്നതിനിടെ അതെ ദിശയില്‍ നിന്നെത്തിയ ബൈക്ക് സദാശിവന്റെ ഇരുചക്ര വാഹനത്തില്‍ ഇടിക്കുകയായിരുന്നു.
ഇടിയുടെ ആഘാതത്തില്‍ തെറിച്ചു വീണ സദാശിവനെ ഉടന്‍ തന്നെ മട്ടന്നൂരിലെ സ്വകാര്യ ആശുപത്രിയില്‍ എത്തിച്ചെങ്കിലും ജീവന്‍ രക്ഷിക്കാനായില്ല.
അപകടത്തില്‍ വാഹനത്തിന്റെ മുന്‍വശം പൂര്‍ണ്ണമായും തകര്‍ന്നു. ബൈക്ക് യാത്രികന്റെ പരിക്ക് നിസാരമാണ്.
പരേതരായ നാരായണമാരാര്‍-മാധവിഅമ്മ ദമ്പതികളുടെ മകനാണ്.
ശ്രീകലയാണ് ഭാര്യ.
കേരളാ ഗ്രാമീണ്‍ ബാങ്ക് ഡിപ്പോസിറ്റ് കളക്ടേഴ്‌സ് യൂണിയന്‍ കണ്ണൂര്‍ ജില്ലാ വൈസ് പ്രസിഡന്റും സംസ്ഥാന കമ്മറ്റി അംഗവുമാണ് സദാശിവന്‍.