പ്രേമംമൂത്ത് പെണ്‍കുട്ടിയെ തേടിവീട്ടിലെത്തിയ ക്ലാസ്‌മേറ്റിന് അടിയഭിഷേകം.
ആദൂര്‍: പ്രേമം മൂത്ത് പെണ്‍കുട്ടിയെ കാണാന്‍ വീട്ടിലെത്തിയ ക്ലാസ്‌മേറ്റിനെ സഹോദരങ്ങളും സുഹൃത്തുക്കളും ചേര്‍ന്ന് കാറില്‍ കയറ്റിക്കൊണ്ടുപോയി മര്‍ദ്ദിച്ചതായി പരാതി.
സംഭവത്തില്‍ 13 പേര്‍ക്കെതിരെ ആദൂര്‍ പോലീസ് കേസെടുത്തു.
കാറഡുക്ക അടുക്കത്തെ അടുക്കം വീട്ടില്‍ വൈശാഖ്, സഹോദരന്‍ വിഷ്ണു, അമ്പു, മണി, ചേക്കു, പ്രണവ് എന്നിവരും കണ്ടാലറിയാവുന്ന മറ്റ് 7 പേരുമാണ് പ്രതികള്‍.
18 ന് ഞായറാഴ്ച്ച വൈകുന്നേരം നാല് മണിക്കായിരുന്നു കേസിനാസ്പദമായ സംഭവം നടന്നത്.
മീഞ്ചിപ്പദവിലെ പ്രഭാകരന്റെ മകന്‍ മര്‍ക്കട വീട്ടില്‍ അഭിഷേകിനാണ്(18)മര്‍ദ്ദനമേറ്റത്.
വൈശാഖിന്റെയും വിഷ്ണുവിന്റെയും സഹോദരിയെ കാണാനാണ് പ്ലസ് വണ്‍ മുതല്‍ ക്ലാസ്‌മേറ്റായ അഭിഷേക് അടുക്കത്തെ വീട്ടിലെത്തിയത്.
പെണ്‍കുട്ടിയുടെ സഹോദരങ്ങളായ വൈശാഖും വിഷ്ണുവും ബന്ധുക്കളായ മറ്റുള്ളവരും ചേര്‍ന്ന് അഭിഷേകിനെ തടഞ്ഞുവെച്ച് മര്‍ദ്ദിക്കുകയും പ്രതികളുടെ പിതാവിന്റെ കെ.എല്‍.60 പി. 8501 നമ്പര്‍ കാറില്‍ ബലമായി പിടിച്ചുകയറ്റി
ബെള്ളൂരടുക്കം എന്ന സ്ഥലത്തെ വിജനമായ പ്രദേശത്തേക്ക് കൊണ്ടുപോയി മര്‍ദ്ദിക്കുകയും ഇനി ഇതാവര്‍ത്തിച്ചാല്‍ വീടിന് പെട്രോളൊഴിച്ച് തീവെച്ച് അതിനകത്തിട്ട് കൊല്ലുമെന്ന് ഭീഷണിപ്പെടുത്തുകയും ചെയ്തുവെന്നാണ് പരാതി.
പരിക്കേറ്റ അഭിഷേക് കാസര്‍ഗോഡ് കെയര്‍വെല്‍ ആശുപത്രിയില്‍ ചികില്‍സയിലാണ്.