കണ്ണൂര്‍ ഗവ.മെഡിക്കല്‍ കോളേജ് കാമ്പസില്‍ വന്‍ തീപിടുത്തം, ആറേക്കറോളം സ്ഥലം കത്തിനശിച്ചു.
പരിയാരം; കണ്ണൂര്‍ ഗവ.മെഡിക്കല്‍ കോളേജ് കാമ്പസില്‍ വന്‍ തീപിടുത്തം, മൂന്നിടങ്ങളിലായി ആറേക്കറോളം സ്ഥലം കത്തിനശിച്ചു.
തീ മെഡിക്കല്‍ കോളേജ് ഭരണവിഭാഗം ഓഫീസ് കെട്ടിടത്തിന് സമീപത്തേക്ക് പടര്‍ന്നുകയറിയത് പരിഭ്രാന്തി പരത്തി.
ശുചീകരണ പ്രവൃത്തികളുടെ ഭാഗമായി തീയിട്ടപ്പോള്‍ കനത്ത കാറ്റില്‍ തീ പടര്‍ന്നുകയറുകയായിരുന്നു.
തളിപ്പറമ്പ് അഗ്നിശമനനിലയത്തില്‍ നിന്നും ഗ്രേഡ് അസി.സ്റ്റേഷന്‍ ഓഫീസര്‍ കെ.വി.സഹദേവന്റെ നേതൃത്വത്തില്‍ എത്തിയ അന്ഗിശമനസേന മൂന്ന് മണിക്കൂറോളം കഠിനപരിശ്രമം നടത്തിയാണ് തീനിയന്തണവിധേയമാക്കിയത്.
മെഡിക്കല്‍ കോളേജ് പ്രധാനകെട്ടിടത്തിന് സമീപം നാലേക്കര്‍ സ്ഥലവും മറ്റ് രണ്ടിടങ്ങളിലായി ഒരോ ഏക്കര്‍ വീതവുമാണ് തീപിടിച്ചത്.
അഗ്നിശമനസേനയുടെ വാഹനം ചെന്നെത്താന്‍ കഴിയാതെ വന്നതും കനത്ത കാറ്റും തീകെടുത്തുന്നതിന് അഗ്നിശമനസേനക്ക് തടസ്സമായി.
ബക്കറ്റുകളില്‍ വെള്ളമെടുത്താണ് പല സ്ഥലത്തും തീയണച്ചത്.
മെഡിക്കല്‍ കോളേജ് സുരക്ഷാസേനയും വിദ്യാര്‍ത്ഥികളും തീപടരുന്നത് തടയാന്‍ അന്ഗിശമനസേനക്കൊപ്പം സജീവമായി പങ്കെടുത്തു.
മുന്‍കാലങ്ങളില്‍ വേനല്‍കാലം തുടങ്ങുന്നതിന് മുമ്പ് തന്നെ ഫയര്‍ബെല്‍റ്റ് നിര്‍മ്മിക്കാറുണ്ടെങ്കിലും ഇത്തവണ അത് ചെയ്യാത്തതാണ് തീ പടരാന്‍ കാരണമായതെന്ന് അഗ്നിശമനസേന പറഞ്ഞു.
ഫയര്‍ ആന്റ് റെസ്‌ക്യൂ ഓഫീസര്‍മാരായ എം.ജി.വിനോദ്കുമാര്‍, പാലവിള അനീഷ്, സി.അഭിനേഷ്, ജി.കിരണ്‍, വി.ജയന്‍, പി.ചന്ദ്രന്‍ എന്നിവരും അഗ്നിശമനസംഘത്തില്‍ ഉണ്ടായിരുന്നു.