ഡിസ്ക്കൗണ്ട് റേറ്റില് ഷെയര്-കടന്നപ്പള്ളി സ്വദേശിയുടെ 17 ലക്ഷം തട്ടിയെടുത്തു.
പരിയാരം: പ്രൊഫസര് റോബര്ട്ട് പണി കൊടുത്തു, കടന്നപ്പള്ളി സ്വദേശിയുടെ 17 ലക്ഷം തട്ടിയെടുത്തതിന് രണ്ടുപേര്ക്കെതിരെ കേസ്.
ഡിസ്ക്കൗണ്ട് റേറ്റില് ഷെയര് കിട്ടുമെന്ന് വിശ്വസിപ്പിച്ചാണ് കടന്നപ്പള്ളി ചെറുവിച്ചേരിയിലെ പുതിയവീട്ടില് പി.വി.സന്തോഷ്കുമാറിനെ(43) രണ്ടംഗസംഘം വഞ്ചിച്ചത്.
പ്രൊഫസര് റോബര്ട്ട് പ്രോഫിറ്റ് 619 എന്ന വാട്സ്ആപ്പ് ഗ്രൂപ്പിന്റെ അഡ്മിന്മാരായ ദിയ, ലോകേഷ് പാട്ടീല് എന്നിവരുടെ പേരിലാണ് പരിയാരം പോലീസ് കേസെടുത്തത്.
2024 മെയ്-25 മുതല് ജൂണ് 14 വരെയുള്ള കാലത്താണ് ഇവര് നിര്ദ്ദേശിച്ച വിവിധ അക്കൗണ്ടുകളിലേക്ക് സന്തോഷ്കുമാര് 17,06,000 രൂപ നിക്ഷേപിച്ചത്.
ഇവരുടെ വാട്സ്ആപ്പ് ഗ്രൂപ്പില് അംഗമായ സന്തോഷിന് ഇന്സ്റ്റിറ്റിയൂഷണല് ഇന്വെസ്റ്റേഴ്സ് ആക്കൗണ്ട് ആരംഭിക്കാന് വാട്സ്ആപ്പിലേക്ക് ലിങ്ക് അയച്ചുകൊടുക്കുകയായിരുന്നു.
ഈ ലിങ്ക് വഴിയാണ് അക്കൗണ്ട് തുറന്ന് പണം നിക്ഷേപിച്ചത്.
പ്രതികള് പിന്നീട് ഈ ട്രേഡിംഗ് അക്കൗണ്ട് നിഷ്ക്രിയമാക്കുകയും ഷെയര് വാങ്ങാനായി അയച്ചുകൊടുത്ത പണത്തിന് അനുസരിച്ച് ഷെയര് നല്കുകയോ പണം തിരിച്ചുകൊടുക്കുകയോ ചെയ്തില്ലെന്നാണ് പരാതി.
കഴിഞ്ഞ ദിവസം പാണപ്പുഴ സ്വദേശിക്ക് ക്രിപ്റ്റോ കറന്സി ട്രേഡിംഗിന് നല്കിയ 3,92,500 രൂപ നഷ്ടപ്പെട്ടിരുന്നു.