ഇനി സപ്ലൈ ഓഫീസുകളില്‍ പോകണമെന്നില്ല- എല്ലാം വിരല്‍തുമ്പില്‍ നടക്കും-
കണ്ണൂര്‍: പൊതുവിതരണ വകുപ്പിന്റെ സമ്പൂര്‍ണ്ണ ഇ-ഓഫീസ് ജില്ലയായി കണ്ണൂര്‍. ജില്ലയിലെ തലശ്ശേരി, ഇരിട്ടി, തളിപ്പറമ്പ്, കണ്ണൂര്‍, പയ്യന്നൂര്‍ എന്നീ താലൂക്ക് സപ്ലൈ ഓഫീസുകളിലെയും കണ്ണൂര്‍ ജില്ലാ സപ്ലൈ ഓഫീസിലെയും ഫയല്‍ നീക്കം പൂര്‍ണ്ണമായും ഇ-ഓഫീസ് സംവിധാനത്തിലേക്ക് മാറി.
2022 ജനുവരിയോടെ പൊതുവിതരണ വകുപ്പിനു കീഴിലെ മുഴുവന്‍ ഓഫീസുകളും പൂര്‍ണ്ണമായും ഇ-ഓഫീസുകളാകും.
എന്നാല്‍ ഡിസംബര്‍ 23നകം തന്നെ ജില്ലയിലെ എല്ലാ സപ്ലൈ ഓഫീസുകളും ഇ-ഓഫീസുകളായി മാറ്റിയതായി ജില്ല സിവില്‍ സപ്ലൈസ് ഓഫീസറുടെ ചാര്‍ജ് വഹിക്കുന്ന കെ.രാജീവ് അറിയിച്ചു.
ഇ-ഓഫീസ് സംവിധാനം വഴി ഫയല്‍ നീക്കം വേഗത്തിലാക്കാനും സുതാര്യമാക്കാനും സാധിക്കും.
ഡിജിറ്റല്‍ സിഗ്‌നേച്ചര്‍ വഴി ഉദ്യോഗസ്ഥര്‍ക്ക് പരിശോധിക്കുന്നതിനും ഓഫീസ് ഫയലുകള്‍ സ്‌റ്റേറ്റ് ഡാറ്റാ സെന്ററില്‍ സൂക്ഷിക്കാനും കഴിയും.
പൊതുജനങ്ങള്‍ക്ക് ഓഫീസില്‍ വരാതെ തന്നെ അപേക്ഷയുടെയും പരാതികളുടെയും തല്‍സ്ഥിതി https://eoffice.kerala.gov.in എന്ന പോര്‍ട്ടലില്‍ ലഭിക്കും.
റേഷന്‍ കാര്‍ഡുമായി ബന്ധപ്പെട്ട എല്ലാ അപേക്ഷകളും നിലവില്‍ ഓണ്‍ലൈനായി അക്ഷയ കേന്ദ്രങ്ങള്‍ മുഖേനയും സിറ്റിസണ്‍ ലോഗിന്‍ വഴിയുമാണ് സമര്‍പ്പിക്കേണ്ടത്.
റേഷന്‍കാര്‍ഡിലെ മാറ്റങ്ങള്‍ക്കായോ പുതിയ റേഷന്‍ കാര്‍ഡിനായോ ഇനി സപ്ലൈ ഓഫീസുകളില്‍ പോകേണ്ടതില്ല.
അപേക്ഷ അംഗീകരിക്കുന്ന മുറക്ക് റേഷന്‍ കാര്‍ഡുകള്‍ ഡൗണ്‍ലോഡ് ചെയ്യാം. ജില്ലാ ബ്രാഞ്ച് മാനേജര്‍ സുചിത്രയുടെ നേതൃത്വത്തില്‍ എല്ലാ താലൂക്കുകളിലെയും ജീവനക്കാര്‍ക്ക് ഇത് സംബന്ധിച്ച പരിശീലനം നല്‍കിക്കഴിഞ്ഞു.