ബൈക്ക് യാത്രക്കാരന്‍ കാറിന്റെ ഗ്ലാസ് അടിച്ചു തകര്‍ത്തതായി പരാതി
തളിപ്പറമ്പ്: ബൈക്കില്‍ കാര്‍ തട്ടിയതായി ആരോപിച്ച് ബൈക്ക് യാത്രികന്‍ കാറിന്റെ ചില്ല് ഹെല്‍മെറ്റ് ഉപയോഗിച്ച് അടിച്ച്തകര്‍ക്കുകയും കയ്യേറ്റം ചെയ്യുകയും ചെയ്തതായി പരാതി.
ഇന്നലെ അര്‍ദ്ധരാത്രി 12.30 ന് തളിപ്പറമ്പ് ലൂര്‍ദ്ദ് ആശുപത്രിക്ക് മുന്നിലാണ് സംഭവം.
പുളിമ്പറമ്പില്‍ നിന്നും കരിമ്പത്തേക്ക് കുടുംബസമേതം കാറില്‍ യാത്രചെയ്യുകയായിരുന്ന സര്‍സയ്യിദ് ഹയര്‍സെക്കണ്ടറി സ്‌ക്കൂള്‍ ജീവനക്കാരന്‍ സീന്റകത്ത് മുഹമ്മദ്കുഞ്ഞിയുടെ(44) കെ.എല്‍-60-എ1134 കാറിന് നേരെയാണ് പട്ടുവം മുറിയാത്തോട് സ്വദേശി പ്രിയേഷ് ആക്രമം നടത്തിയത്.
സാന്‍ജോസ് സ്‌ക്കൂളില്‍ നടന്ന വാര്‍ഷികാഘോഷത്തില്‍ പങ്കെടുത്ത് വീട്ടിലേക്ക് മടങ്ങുകയായിരുന്നു മുഹമ്മദ്കുഞ്ഞി.
പ്രിയേഷിനെ തളിപ്പറമ്പ് പോലീസ് അറസ്റ്റ് ചെയ്തു. കാറിന്റെ ഡ്രൈവറുടെ ഭാഗത്തെ ചില്ലാണ് അടിച്ച് തകര്‍ത്തത്.