തൊഴിലന്വേഷകര്‍ക്കായി മോഡല്‍ കരിയര്‍ സെന്റര്‍ വരുന്നു
എം വിജില്‍ എം എല്‍ എ യുടെ നേതൃത്വത്തില്‍ പദ്ധതി സ്ഥലം സന്ദര്‍ശിച്ചു
കണ്ണൂര്‍: സ്വകാര്യമേഖലയിലെ തൊഴിലവസരങ്ങള്‍ തൊഴിലന്വേഷകര്‍ക്ക് പ്രാപ്യമാക്കുക എന്ന ലക്ഷ്യം മുന്‍നിര്‍ത്തി കേന്ദ്ര സംസ്ഥാന സര്‍ക്കാരുകളുടെ പങ്കാളിത്തത്തോടെ മാങ്ങാട്ട് പറമ്പ് കണ്ണൂര്‍ യൂണിവേഴ്‌സിറ്റി എംപ്ലോയ്‌മെന്റ് ഇന്‍ഫര്‍മേഷന്‍ ആന്‍ഡ് ഗൈഡന്‍സ് ബ്യൂറോയില്‍ മോഡല്‍ കരിയര്‍ സെന്റര്‍ ആരംഭിക്കുന്നു.
സര്‍ക്കാരിന്റെ രണ്ടാം 100 ദിന കര്‍മപരിപാടിയില്‍ ഉള്‍പ്പെടുത്തിയാണ് പദ്ധതി ആരംഭിക്കുന്നത്. പദ്ധതി ആരംഭിക്കുന്നതിന് മുന്നോടിയായി എം വിജിന്‍ എം എല്‍ എ യുടെ നേതൃത്വത്തില്‍ ക്യാമ്പസ് സന്ദര്‍ശിച്ചു.
തൊഴില്‍ വകുപ്പിന്റെ കീഴില്‍ ആരംഭിക്കുന്ന കേരളത്തിലെ രണ്ടാമത്തെ മോഡല്‍ കരിയര്‍ സെന്റര്‍ ആരംഭിക്കുന്നതിനായി സര്‍ക്കാര്‍ 69.90 ലക്ഷം രൂപയാണ് അനുവദിച്ചത്.
കണ്ണൂര്‍ നിര്‍മിതി കേന്ദ്രത്തിനാണ് പദ്ധതി ചുമതല. സ്വകാര്യ മേഖലയിലെ തൊഴിലുകള്‍ നേടിയെടുക്കുന്നതിന് ഉദ്യോഗാര്‍ത്ഥികളെ പ്രാപ്തരാക്കുന്നതിനാവശ്യമുള്ള സമഗ്രമായ കര്‍മ്മപരിപാടി ആസൂത്രണം ചെയ്ത് നടപ്പാക്കുക,
ഉദ്യോഗാര്‍ത്ഥികളുടെ തൊഴില്‍പരമായ അഭിരുചി ശാസ്ത്രീയമായി കണ്ടെത്തി അവര്‍ക്കാവശ്യമായ മാര്‍ഗ്ഗനിര്‍ദ്ദേശം നല്‍കുക, ഗ്രൂപ്പ് കൗണ്‍സിലിങ്, വ്യക്തിഗത മാര്‍ഗ്ഗ നിര്‍ദ്ദേശങ്ങള്‍, ഗ്രൂപ്പ് ഡിസ്‌ക്കഷന്‍, നൈപുണ്യ പരിശീലനങ്ങള്‍ തുടങ്ങിയ വിവിധ സേവനങ്ങള്‍ സെന്ററില്‍ നിന്നും ലഭിക്കുന്നതാണ്.
കേന്ദ്ര സര്‍ക്കാര്‍ തയ്യാറാക്കിയിട്ടുള്ള www.ncs.gov.in എന്ന വെബ്ബ് പോര്‍ട്ടല്‍ മോഡല്‍ കരിയര്‍ സെന്ററിന്റെ വെബ് പോര്‍ട്ടല്‍ ആയി ഉപയോഗിച്ചുവരുന്നു.
ഉദ്യോഗാര്‍ത്ഥികള്‍ക്ക് പ്രസ്തുത പോര്‍ട്ടലില്‍ പേര് രജിസ്റ്റര്‍ ചെയ്യാവുന്നതും മോഡല്‍ കരിയര്‍ സെന്ററിന്റെ സേവനം സൗജന്യമായി പ്രയോജനപ്പെടുത്താവുന്നതുമാണ്.
സ്വകാര്യ മേഖലയിലെ പ്രമുഖ തൊഴില്‍ ദായകരുമായി ചേര്‍ന്ന് ഉദ്യോഗദായകര്‍ക്കും ഉദ്യോഗാര്‍ത്ഥികള്‍ക്കും ഒരു പോലെ പ്രയോജനപ്പെടുന്നവിധത്തില്‍ കൃത്യമായ ആസൂത്രണത്തോടു കൂടി മോഡല്‍ കരിയര്‍ സെന്റര്‍ നിശ്ചിത ഇടവേളകളില്‍ ജോബ് ഫെയര്‍/പ്ലേസ്‌മെന്റ് നടത്തി വരുന്നുണ്ട്.
തൊഴില്‍ വകുപ്പിന്റെ കീഴില്‍ നിലവിലുള്ള ഏക മോഡല്‍ കരിയര്‍ സെന്ററായ തിരുവനന്തപുരം മോഡല്‍ കരിയര്‍ സെന്ററിലൂടെ നാളിതുവരെയായി 36 പ്ലേസ്‌മെന്റ് സംഘടിപ്പിക്കുകയും 2956 പേര്‍ക്ക് സ്വകാര്യമേഖലയിലെ വിവിധ സ്ഥാപനങ്ങളില്‍ തൊഴില്‍ ലഭിക്കുകയും ചെയ്തിട്ടുണ്ട്.
മെയ് മാസം രണ്ടാം വാരം സെന്റര്‍ ഉദ്ഘാടനം ചെയ്യുന്നതിനാണ് നിശ്ചയിച്ചിട്ടുള്ളത്. കല്യാശ്ശേരി പഞ്ചായത്ത് പ്രസിഡന്റ് ടി.ടി ബാലകൃഷ്ണന്‍, എസ് എസ് സാജു (സംസ്ഥാന വെക്കേഷണല്‍ ഗൈഡന്‍സ് ഓഫീസര്‍),
എസ്ജയശ്രീ (ജില്ല എംപ്ലോയ്‌മെന്റ് ഓഫീസര്‍), രമേശന്‍ കുനിയില്‍ (എംപ്ലോയ്‌മെന്റ് ഓഫീസര്‍ വി.ജി) കണ്ണൂര്‍ യൂണിവേഴ്‌സിറ്റി മാങ്ങാട്ടുപറമ്പ ക്യാമ്പസ് ഡയറക്ടര്‍ ഡോ. വില്‍സണ്‍ വി.എ
പ്രമോദ്കുമാര്‍ കെ. എന്‍ ഡെപ്യൂട്ടി ചീഫ്, എംപ്ലോയ്‌മെന്റ് ബ്യുറോ, കണ്ണൂര്‍ യൂണിവേഴ്‌സിറ്റി, സജിത്ത് കെ എക്‌സിക്യൂട്ടീവ് സെക്രട്ടറി നിര്‍മിതി കേന്ദ്ര, സൈറ്റ് എഞ്ചിനിയര്‍ പി.സിത്താര എന്നിവരും ഉണ്ടായിരുന്നു.