തളിപ്പറമ്പില്‍ കവര്‍ച്ച-വീട്ടിന്റെ വാതില്‍ തകര്‍ത്ത് അകത്തുകടന്ന മോഷ്ടാവ് ഉറങ്ങിക്കിടന്ന വീട്ടമ്മയുടെ സ്വര്‍ണമാല കവര്‍ന്നു-
തളിപ്പറമ്പ്: വീടിന്റെ വാതില്‍ തകര്‍ത്ത് അകത്തുകടന്ന മോഷ്ടാവ് നേഴ്‌സായ വീട്ടമ്മയുടെ സ്വര്‍ണമാല പിടിച്ചുപറിച്ച് ഓടിരക്ഷപ്പെട്ടു.
ഇന്ന് പുലര്‍ച്ചെ 3.15 ന് ചിറവക്കിലെ വീട്ടിലിയിരുന്നു സംഭവം. ചിറവക്കില്‍ ജെ.കെ.എസ്.റസിഡന്‍സി ലോഡ്ജിന് എതിര്‍വശം താമസിക്കുന്ന നടുവിലിലെ കാക്കനാട്ട് മോളി ജോസിന്റെ രണ്ടേമുക്കാല്‍ പവന്റെ സ്വര്‍ണമാലയാണ് മോഷ്ടാവ് പിടിച്ചുപറിച്ച് കൊണ്ടുപോയത്.
മുന്‍ഭാഗത്തെ വാതിലാണ് തകര്‍ത്തത്. ഭര്‍ത്താവും മക്കളും ഒരു റൂമിലും മോളിയും അമ്മയും മറ്റൊരു റൂമിലുമാണ് കിടന്നിരുന്നത്.
ഫാന്‍ സ്പീഡില്‍ ഇട്ടിരുന്നതിനാല്‍ വാതില്‍ തകര്‍ക്കുന്ന ശബ്ദം കേട്ടില്ല. ഉറങ്ങിക്കിടക്കുകയായിരുന്ന മോളിയുടെ കഴുത്തിലെ മാല പൊട്ടിക്കാന്‍ ശ്രമിക്കുമ്പോഴാണ് ഉറക്കമുണര്‍ന്നത്.
മാലപൊട്ടിക്കുന്നതിനിടയില്‍ മോളി ജോസിന്റെ കഴുത്തിന് പരിക്കേറ്റു.
ബഹളം വെച്ചപ്പോഴേക്കും മോഷ്ടാവ് പുറത്തേക്ക് ഓടിരക്ഷപ്പെട്ടു. ഉടന്‍ തളിപ്പറമ്പ് പോലീസില്‍ അറിയിച്ചതുപ്രകാരം പോലീസെത്തി പരിശോധന നടത്തിയെങ്കിലും മോഷ്ടാവിനെ കണ്ടെത്താനായില്ല.
വീടിനെയും പരിസരത്തെയും കുറിച്ച് ശരിക്കറിയാവുന്ന ആരോ ആണ് സംകവര്‍ച്ചക്ക് പിന്നിലെന്നാണ് നിഗമനം.
പുറത്ത് ഇരുട്ടായതിനാല്‍ മോഷ്ടാവിനെ തിരിച്ചറിയാനായില്ലെന്ന് മോളി ജോസ് പറഞ്ഞു. തളിപ്പറമ്പ് ലൂര്‍ദ്ദ് ആശുപത്രിയിലെ നേഴ്‌സാണ് മോളി ജോസ്.