പ്രതിപക്ഷ സമരം ഗവണ്‍മെന്റിന്റെ വീഴ്ച മറച്ചുവെക്കാന്‍-ആഞ്ഞടിച്ച് ഭരണപക്ഷം.
തളിപ്പറമ്പ്: തളിപ്പറമ്പ് നഗരസഭ പദ്ധതി പ്രവര്‍ത്തനങ്ങളിലും മറ്റും മികച്ച പ്രവര്‍ത്തനങ്ങളുമായി മുന്നോട്ടു കുതിക്കുമ്പോള്‍ അതിനോട് ചേര്‍ന്ന് നില്‍ക്കാതെ സമര പ്രഹസനം നടത്തുന്നത് വിരോധാഭാസമാണെന്ന് നഗരസഭ ചെയര്‍പേഴ്‌സണ്‍ മുര്‍ഷിദ കൊങ്ങായി, വൈസ് ചെയര്‍മാന്‍ കല്ലിങ്കീല്‍ പത്മനാഭന്‍ എന്നിവര്‍ സംയുക്ത പ്രസ്താവനയില്‍ പറഞ്ഞു.
2022-23 വാര്‍ഷിക പദ്ധതിയില്‍ 95 ശതമാനം പദ്ധതി ചിലവഴിച്ച് നിരവധി വികസന പ്രവര്‍ത്തനങ്ങള്‍ നടത്തി സംസ്ഥാനതലത്തില്‍ പത്താം സ്ഥാനവും കണ്ണൂര്‍ ജില്ലയില്‍ ഒന്നാം സ്ഥാനവും കരസ്ഥമാക്കിയ നഗരസഭ അഭിമാനത്തോടെയാണ് മുന്നോട്ട് നീങ്ങുന്നത്.
2023-24 സാമ്പത്തിക വര്‍ഷത്തില്‍ ഗവണ്‍മെന്റ് ഫണ്ട് അനുവദിക്കുന്നതിലും ചെലവഴിക്കുന്നതിലും പദ്ധതി പ്രവര്‍ത്തനങ്ങള്‍ നടത്തുന്നതിനും ഒട്ടേറെ തടസ്സങ്ങള്‍ സൃഷ്ടിക്കുകയും അനുവദിച്ച ഫണ്ട് ചെലവഴിക്കുന്നതിന് ട്രഷറി നിയന്ത്രണം കാരണം ഫണ്ട് വിതരണം ചെയ്യാതെ ഗവണ്‍മെന്റ് തിരിച്ചെടുക്കുന്ന സ്ഥിതിയുമാണ് കഴിഞ്ഞ സാമ്പത്തിക വര്‍ഷത്തില്‍ തദ്ദേശസ്വയംഭരണ സ്ഥാപനങ്ങള്‍ അഭിമുഖീകരിച്ചത്.
എന്നാല്‍ ഒട്ടേറെ പ്രയാസങ്ങളും ഉണ്ടായിട്ടും കഴിഞ്ഞ സാമ്പത്തിക വര്‍ഷം 82.25% പദ്ധതിതുക ചെലവഴിക്കുകയും (സംസ്ഥാന ആവറേജ് 70% ) കണ്ണൂര്‍ ജില്ലയില്‍ മൂന്നാം സ്ഥാനത്ത് എത്താനും നമുക്ക് കഴിഞ്ഞിട്ടുണ്ട്.
മാര്‍ച്ച് 28-ന് മുന്‍പ് ട്രഷറിക്ക് നല്‍കിയ ഒരു കോടി 59 ലക്ഷം രൂപ ട്രഷറി നിയന്ത്രണം പറഞ്ഞു തടസ്സം ഇല്ലാതിരുന്നെങ്കില്‍ ഈ തുക ഉള്‍പ്പെടുത്തി 100% പദ്ധതി തുക ചെലവഴിച്ച നേട്ടവും തളിപ്പറമ്പ് നഗരസഭയ്ക്ക് ലഭിക്കുമായിരുന്നു.
2023- 24 സാമ്പത്തിക വര്‍ഷം സംസ്ഥാന സര്‍ക്കാര്‍ അനുവദിച്ച റോഡ് മെയിന്റനന്‍സ് ഫണ്ട് രണ്ട് കോടി 76 ലക്ഷം ആണ് എന്നാല്‍ ലഭിച്ചത് ഒരു കോടി 84 ലക്ഷം മാത്രമാണ് നഗരസഭ റോഡ് മെയിന്റനന്‍സിന് വേണ്ടി തനത് ഫണ്ട് ഉള്‍പ്പെടെ 3 കോടി 62 ലക്ഷം രൂപയുടെ വര്‍ക്ക് പൂര്‍ത്തിയാക്കിയിട്ടുണ്ട്.
പ്ലാന്‍ ഫാണ്ടായി അനുവദിച്ച 3 കോടി 40 ലക്ഷമാണ്. ലഭിച്ചത് 3 കോടി 10 ലക്ഷവുമാണ് അതില്‍ അവസാന ഗഡു അനുവദിച്ചത് മാര്‍ച്ച് 22നാണ്. മാര്‍ച്ച് 23 മുതല്‍ ട്രഷറി നിയന്ത്രണം കാരണം ഒരു രൂപ പോലും പാസാക്കിയില്ല.
അനുവദിച്ച തുക ചെലവാക്കിയില്ല എന്ന് പറഞ്ഞ് മാര്‍ച്ച് 31ന് 1 കോടി 52 ലക്ഷം തിരിച്ചുപിടിക്കുകയും ചെയ്തു.ട്രഷറി നിയന്ത്രണം കാരണം ചെലവാക്കിയ ഫണ്ട് അനുവദിക്കാതെ ഈ കെടുതി ചെയ്തിട്ടുള്ള ഗവണ്‍മെന്റിനെതിരെ ചെറുവിരല്‍ അനക്കാന്‍ സമരകാര്‍ക്ക് കഴിയുന്നില്ല എന്നത് അത്ഭുതപ്പെടുത്തുന്നു.
മാര്‍ച്ച് 28-ന് അനുവദിച്ച പദ്ധതി ട്രഷറി നിയന്ത്രണം കാരണം 2024 -25 വാര്‍ഷിക പദ്ധതിക്ക് നല്‍കാനാണ് ഗവണ്‍മെന്റ് ഉത്തരവ്. ഫലത്തില്‍ ഈ വാര്‍ഷിക പദ്ധതിക്ക് ഫണ്ട് കണ്ടെത്താന്‍ ആവാതെ വിഷമിക്കുകയാണ് തദ്ദേശ സ്വയംഭരണ സ്ഥാപനങ്ങള്‍. സര്‍ക്കാരിന്റെ ഭാഗത്തുനിന്ന് ഗുരുതരമായ വീഴ്ച ഉണ്ടായിട്ടും നഗരസഭ തയ്യാറാക്കിയ 2024 -25 വാര്‍ഷിക പദ്ധതി ഒന്നും വേണ്ടെന്ന് വെക്കാതെ തനത് ഫണ്ട് ഉള്‍പ്പെടെ വകയിരുത്തി തയ്യാറാക്കി പദ്ധതി ഡിപിസി അംഗീകാരം ലഭിക്കുകയുണ്ടായി.
ഇലക്ഷന്‍ പെരുമാറ്റചട്ടം കഴിഞ്ഞ് റിവിഷന്‍ ഡി.പി.സി അംഗീകാരം തന്നത് ആാഗസ്റ്റ് അവസാന വാരത്തോടെയാണ്. ഇത് സൂചിപ്പിക്കുന്നത് തന്നെ ഗവണ്‍മെന്റ് തദ്ദേശസ്വയംഭരണ സ്ഥാപനങ്ങളെ കഴുത്തു ഞെരിച്ച് കെല്ലാന്‍ ശ്രമിക്കുന്നു എന്നത് തന്നെയാണ്. ഫണ്ട് ചെലവാക്കുന്നതിന് കര്‍ശന നിയന്ത്രണം കാരണം വര്‍ക്ക് എടുക്കുന്ന കോണ്‍ട്രാക്ടര്‍മാര്‍ പദ്ധതി പൂര്‍ത്തിയാക്കാന്‍ വൈമുഖ്യം കാണിക്കുന്നു എന്നത് യാഥാര്‍ത്ഥ്യമാണ്.
കഴിഞ്ഞ സാമ്പത്തിക വര്‍ഷം ഒക്ടോബര്‍ മുതല്‍ ഫെബ്രുവരി വരെ ഒരു ലക്ഷത്തിന് മുകളിലുള്ള ഒരു ഫണ്ടും പാസാക്കിയിട്ടില്ല. ഫെബ്രുവരി മുതല്‍ മാര്‍ച്ച് വരെ 5 ലക്ഷം രൂപ വരെ മാത്രമേ പാസാക്കിയിട്ടുള്ളൂ. മാര്‍ക്ക് 22-ന് ശേഷം തദ്ദേശ സ്വയംഭരണ സ്ഥാപനങ്ങളുടെ ഒരു ഫണ്ടും ട്രഷറി പാസാക്കാതെ വലിയ നഷ്ടമാണ് വരുത്തിവെച്ചത്.
ഇങ്ങനെയുള്ള അവസ്ഥ വിശേഷം കേരളത്തിന്റെ ചരിത്രത്തില്‍ ആദ്യമായിട്ടാണ്. ഗവണ്‍മെന്റിന്റെ ഇത്തരം തെറ്റായ നടപടിക്കെതിരെ പ്രതികരിക്കാതിരുന്ന പ്രതിപക്ഷം നഗരസഭയ്ക്ക് എതിരെ സമരം നടത്തുന്നത് വിരോധാഭാസമാണ്. സ്ട്രീറ്റ് ലൈറ്റ് മെയിന്റനന്‍സ് നഗരസഭ എ എം സി നല്‍കിയിരുന്നു.
വര്‍ക്ക് ചെയ്യുന്ന ടെക്‌നീഷ്യന്‍ സ്‌ട്രോക്ക് വന്ന് ചികിത്സയിലാണ് പകരം വന്ന ടെക്‌നീഷ്യന്‍ വര്‍ക്ക് ആരംഭിച്ചിട്ടുണ്ട്. സര്‍ക്കാര്‍ കൊട്ടിഘോഷിച്ചു കൊണ്ടുവന്ന നിലാവ് സ്ട്രീറ്റ് ലൈറ്റ് പദ്ധതി അമ്പേ പരാജയപ്പെടുകയും ചെയ്തു. നഗരസഭ നിലാവ് പദ്ധതിയില്‍ ഉള്‍പ്പെടുത്തി 1000 സ്ട്രീറ്റ് ലൈറ്റ് സ്ഥാപിക്കാന്‍ കെഎസ്ഇബി ക്ക് കരാര്‍ കൊടുത്തെങ്കിലും ഇതുവരെ 550 ലൈറ്റുകള്‍ മാത്രമാണ് സ്ഥാപിച്ചിട്ടുള്ളത്. സ്ഥാപിച്ചതില്‍ കേടായലൈറ്റുകള്‍ മാറ്റി സ്ഥാപിക്കാന്‍ കെ.എസ്.ഇ.ബി തയ്യാറാവുന്നില്ല.
ഇതിനെതിരെ സമരക്കാര്‍ക്ക് മിണ്ടാട്ടമില്ല. ഈ പ്രതിസന്ധികള്‍ക്കിടയിലും നഗരസഭ ഒട്ടേറെ വികസന പ്രവര്‍ത്തനങ്ങള്‍ നടത്തിവരുന്നുണ്ട്.
ഭിന്നശേഷിക്കാരെ ചേര്‍ത്ത് പിടിച്ച് ബഡ്സ് സ്‌കൂള്‍ ആരംഭിച്ചു എന്നതില്‍ അഭിമാനം കൊള്ളുകയാണ്. തളിപ്പറമ്പ് നഗര വിഭജിച്ച് ബഡ്സ് സ്‌കൂള്‍ ആന്തൂരില്‍ പോയതിനു ശേഷം 8 വര്‍ഷമായി നഗരസഭക്ക് ബഡ്സ് സ്‌കൂള്‍ ഇല്ലാതിരുന്നു ആ പ്രശ്‌നമാണ് പരിഹരിച്ചത്.
മുന്‍സിപ്പല്‍ ലൈബ്രറി നവീകരണം, കൂവോട് പ്രീമെട്രിക് ഹോസ്റ്റല്‍ നവീകരണം, കൂവോട് ആയുര്‍വേദ ആശുപത്രി നവീകരണം, അളളാംകുളം സാംസ്‌കാരിക നിലയം പൂര്‍ത്തീകരണം, പുഷ്പഗിരി ഗാന്ധിനഗര്‍ കെ.വി.മുഹമ്മദ് കുഞ്ഞി സാംസ്‌കാരിക നിലയം പൂര്‍ത്തീകരണം, കറുപ്പകുണ്ട് ജലാശയം സംരക്ഷിക്കുന്ന പദ്ധതി, കാക്കത്തോട് മാലിന്യ ഡ്രൈയിനേജ് 3 കോടി രൂപയുടെ പദ്ധതി, പാളയാട് തോട് നവീകരണം 2 കോടി രൂപയുടെ പദ്ധതി, തളിപ്പറമ്പ് സിഡിഎസ് ഓഫീസ് നവീകരണ പദ്ധതി എന്നിവ പൂര്‍ത്തീകരിച്ചു. പുളിമ്പറമ്പ് വ്യവസായ എസ്റ്റേറ്റ് വിപുലീകരണം, നഗരസഭ ബസ് സ്റ്റാന്‍ഡ് നവീകരണം, ശുചിത്വ മാലിന്യപ്രശ്‌നങ്ങള്‍ പരിഹരിക്കുന്നതിന് വിന്‍ഡ്രോകമ്പോസ്റ്റ്, പുഷ്പഗിരി ഗാന്ധിനഗര്‍ സ്‌പോര്‍ട്‌സ് ഹബ്ബ്, തളിപ്പറമ്പ് ഹൈവേ സൗന്ദര്യവല്‍ക്കരണം, എഞ്ചിനീയറിങ് സെക്ഷന്‍ ഓഫീസ് നവീകരണം, നഗരസഭ ബസ് സ്റ്റാന്‍ഡ് കോംപ്ലക്‌സ് ലിഫ്റ്റ്, നഗരസഭ ഓപ്പണ്‍ ജിംനേഷ്യം നഗരസഭ വനിത ഫിറ്റ്‌നസ് സെന്റര്‍, ഷി ലോഡ്ജ് പുളിപ്പറമ്പ് പുഴകുളങ്ങര കുളങ്ങളുടെ നവീകരണം തുടങ്ങിയ ഒട്ടേറെ പദ്ധതി പ്രവര്‍ത്തനങ്ങള്‍ നിലവിലുണ്ട് .കാക്കത്തോട് മലയോര ബസ്റ്റാന്‍ഡ്, മുനിസിപ്പല്‍ കോമ്പൗണ്ടില്‍ സി എച്ച് മുഹമ്മദ് കോയ മെമ്മോറിയല്‍ ടൗണ്‍ ഹാള്‍ കം ഷോപ്പിംഗ് കോംപ്ലക്‌സ് നിര്‍മ്മാണം എന്നിവ ഡി പി ആര്‍ തയ്യാറാക്കുന്ന പ്രവര്‍ത്തനത്തിലാണ്.
ഇങ്ങനെ ഒട്ടേറെ വികസന പ്രവര്‍ത്തനങ്ങളുമായി മുന്നോട്ടുപോകുന്ന നഗരസഭക്കെതിരെ സമര പ്രഹസനം നടത്തുന്നത് ഗവണ്‍മെന്റിന്റെ വീഴ്ച മറച്ചുവെക്കാനാണെന്ന് ആര്‍ക്കാണ് അറിയാത്തത്. നഗരസഭയുടെ വികസനത്തിന് കക്ഷി രാഷ്ട്രീയ ഭേദമന്യേ തളിപ്പറമ്പിലെ നല്ലവരായ ജനങ്ങളുടെ പൂര്‍ണ്ണ പിന്തുണയുണ്ടെന്ന് കൂടി അറിയിക്കുകയാണെന്നും പ്രസ്താവനയില്‍ പറയുന്നു.