തോല്‍വി വനം-ധന വകുപ്പുകള്‍ക്ക് വലിയ പങ്കുണ്ട്. ജോസ് ചെമ്പേരി
കണ്ണൂര്‍: തെരഞ്ഞെടുപ്പ് പരാജയത്തില്‍ ധന-വനം വകുപ്പുകള്‍ക്കെതിരെ രൂക്ഷ വിമര്‍ശനവുമായി ഭരണകക്ഷി നേതാവ്.
ലോകസഭ തെരഞ്ഞെടുപ്പില്‍ ഇടതുപക്ഷ ജനാധിപത്യമുന്നണി പിന്നിലായതില്‍ വനം വകുപ്പിന്റെ കെടുകാര്യസ്ഥതക്കും, കര്‍ഷക പെന്‍ഷന്‍ കോള്‍ഡ് സ്റ്റോറേജില്‍ വെച്ച ധനവകുപ്പിന്റെ ധാര്‍ഷ്ട്യത്തിനും വലിയ പങ്കുണ്ടെന്ന് കേരള കോണ്‍ഗ്രസ്(ബി) സംസ്ഥാന ജന.സെക്രട്ടറി ജോസ് ചെമ്പേരി.
ഇന്ത്യയുടെ ചരിത്രത്തില്‍ കര്‍ഷക പെന്‍ഷന്‍ പ്രഖ്യാപിച്ച ഏക മുഖ്യമന്ത്രി പിണറായി വിജയനാണ്.
കക്ഷിരാഷ്ടിയത്തിനപ്പുറം കേരളത്തിലെ കര്‍ഷകര്‍ മുഖ്യമന്ത്രിയുടെ പിന്നില്‍ അണിനിരന്നു.
ഒന്നാം പിണറായി സര്‍ക്കാറിന്റെ അവസാനനാളുകളില്‍ കര്‍ഷക പെന്‍ഷന്‍ മുഖ്യമന്ത്രി ഉദ്ഘാടനം ചെയ്തു.
ഇതോടെ കര്‍ഷകര്‍ മുഖ്യമന്ത്രിയില്‍ ഒരു രക്ഷകനെ കണ്ടു. തുടര്‍ന്ന് നടന്ന തെരഞ്ഞെടുപ്പല്‍ 91 ല്‍ നിന്നും 99 ല്‍ എത്തിയതില്‍ കൃഷിക്കാര്‍ക്ക് വലിയ പങ്കുണ്ട്.
കര്‍ഷക ക്ഷേമ ബോര്‍ഡ് സമര്‍പ്പിച്ച, മുഖ്യമന്ത്രി ശുപാര്‍ശ ചെയ്ത, പദ്ധതികള്‍ ധനവകുപ്പ് കഴിഞ്ഞ രണ്ടു വര്‍ഷമായി കോള്‍ഡ് സ്റ്റോറേജില്‍ മരവിപ്പിച്ചിരിക്കുകയാണ്.
ധനവകുപ്പിന്റെ ഈ ജനവിരുദ്ധ നടപടിയും, വന്യമൃഗങ്ങളുടെ ആക്രമണത്തില്‍ മനുഷ്യജീവന്‍ ചവുട്ടിമെതിക്കപ്പെട്ടപ്പോള്‍ വനം വകുപ്പ് മൃഗങ്ങള്‍ക്കൊപ്പം എന്ന് തോന്നിപ്പിക്കുന്ന വിധത്തില്‍ സ്വീകരിച്ച കുറ്റകരമായ അനാസ്ഥയും കൃഷിക്കാരുടെ പ്രതീക്ഷ നഷ്ടപ്പെടുത്തി.
ഇത് കര്‍ഷകരെ സര്‍ക്കാരില്‍ നിന്നും അകറ്റി. എല്ലാ പാര്‍ട്ടികളിലും കൃഷിക്കാരുടെ സാന്നിദ്ധ്യം ഉണ്ട്.
കൃഷിക്കാര്‍ സി.പി.എമ്മിലില്ല എന്ന ധനവകുപ്പിന്റെ കാഴ്ചപ്പാട് തെറ്റാണ്. മുഖ്യമന്ത്രിയുടെ തീരുമാനം മരവിപ്പിക്കാന്‍ ധനവകുപ്പിന് ആര് അധികാരം നല്കി.
ഇതൊക്കെയാണ് പരിശോധനക്ക് വിധേയമാക്കേണ്ട വിഷയങ്ങള്‍. ഇടതുപക്ഷം ദുര്‍ബ്ബലമാകരുതെന്ന് ആഗ്രഹിക്കുന്നതുകൊണ്ടാണ് തുറന്നു പറയുന്നതെന്നും ജോസ് ചെമ്പേരി പറഞ്ഞു.