നവകേരള ബസിന്റെ കാര്യത്തില് തീരുമാനമായി.
തിരുവനന്തപുരം: സര്ക്കാര് പരിപടിയായിരുന്ന നവകേരള സദസില് പങ്കെടുക്കാനായി മുഖ്യമന്ത്രിയും മന്ത്രിമാരും യാത്ര ചെയ്ത ‘നവകേരള ബസിന്റെ’ ഭാവി തീരുമാനിച്ചു. ആദ്യം ബസ് തലസ്ഥാനത്തുള്പ്പെടെ പൊതുജനങ്ങള്ക്കായി പ്രദര്ശിപ്പിക്കും. പിന്നീട് വാടകയ്ക്ക് നല്കും. വിവാഹം, വിനോദം, തീര്ഥാടനം തുടങ്ങിയ ആവശ്യങ്ങള്ക്ക് നവകേരള ബസ് വാടകയ്ക്ക് ലഭിക്കും.
കെ.എസ്.ആര്.ടി.സി.യുടെ പേരിലാണ് ബസ് വാങ്ങിയിട്ടുള്ളത്. കെ.എസ്.ആര്.ടി.സി.ക്കാകും പരിപാലനച്ചുമതല. വാടക തീരുമാനിച്ചിട്ടില്ലെങ്കിലും സ്വകാര്യ ആഡംബര ടൂറിസ്റ്റ് ബസുകളെക്കാള് കുറവായിരിക്കും. ദിവസം എണ്ണായിരം രൂപവരെ ഈടാക്കാമെന്ന് ചര്ച്ചവന്നിട്ടുണ്ട്. നവകേരള സദസ്സിന്റെ എറണാകുളത്തെ പര്യടനംകൂടി പൂര്ത്തിയായശേഷമാകും ബസ് കെ.എസ്.ആര്.ടി.സി.ക്ക് വിട്ടുകൊടുക്കുക.