പറശ്ശിനിക്കടവ് പാലം നവീകരണത്തിന് ഭരണാനുമതിയായി
തളിപ്പറമ്പ്:പറശ്ശിനിക്കടവ് പാലം നവീകരണത്തിന് 45 ലക്ഷം രൂപയുടെ ഭരണാനുമതിയായി.
നിലവില്‍ പാലത്തിന്റെ ഉപരിതല ഭാഗത്തെ ടാറിങ് ഇളകി കുഴികള്‍ രൂപപ്പെട്ടിട്ടുണ്ട്.
ഇത് പരിഹരിക്കുന്നതിന് എത്രയും വേഗം നടപടി സ്വീകരിക്കുന്നതിന് ബന്ധപ്പെട്ടവരോട് തളിപ്പറമ്പ് എം എല്‍ എ എം വി ഗോവിന്ദന്‍ മാസ്റ്റര്‍ ആവശ്യപ്പെട്ടിരുന്നു.
ഇതിന്റെ അടിസ്ഥാനത്തിലാണ് തുക അനുവദിച്ച് ഉത്തരവായത്. ധര്‍മശാലപറശ്ശിനിക്കടവ് റോഡ് മെക്കാഡം പ്രവൃത്തി ടെണ്ടര്‍ നടപടികള്‍ പൂര്‍ത്തിയായതും മഴ മാറുന്നതോടു കൂടി പണി ആരംഭിക്കുകയും ചെയ്യും.
ഇതോടൊപ്പം തന്നെ പാലത്തിന്റെ പ്രവൃത്തി കൂടി ആരംഭിക്കാന്‍ സാധിക്കും. യാത്ര കൂടുതല്‍ സുഗമമാകുന്നതോടെ വിനോദ സഞ്ചാര, തീര്‍ത്ഥാടന മേഖലയില്‍ കൂടുതല്‍ ആളുകള്‍ക്ക് ഉപകാരപ്പെടും.
പാലം പ്രവൃത്തിയുടെ സാങ്കേതിക അനുമതി ലഭ്യമാക്കി എത്രയും പെട്ടെന്ന് ടെണ്ടര്‍ നടപടികളിലേക്ക് കടക്കാനും പ്രവൃത്തി എത്രയും വേഗത്തില്‍ പൂര്‍ത്തീകരിക്കാനും എം വി ഗോവിന്ദന്‍ മാസ്റ്റര്‍ എംഎല്‍എ ബന്ധപ്പെട്ടവര്‍ക്ക് നിര്‍ദേശം നല്‍കി.