റാഗിങ്ങ് വീരന്‍മാര്‍ക്ക് സസ്‌പെന്‍ഷന്‍-പ്രിന്‍സിപ്പാല്‍ പരാതി പോലീസിന് കൈമാറി.
പരിയാരം: റാഗിങ്ങ് വീരന്‍മാര്‍ക്ക് സസ്‌പെന്‍ഷന്‍. പിലാത്തറ സെന്റ് ജോസഫ്‌സ് കോളേജില്‍ ഒന്നാംവര്‍ഷ വിദ്യാര്‍ത്ഥിയെ റാഗിങ്ങിനെ എതിര്‍ത്തതിന് മര്‍ദ്ദിച്ച സംഭവത്തില്‍ പോലീസ് കേസെടുത്ത 8 വിദ്യാര്‍ത്ഥികളെ മാനേജ്‌മെന്റ് സസ്‌പെന്റ് ചെയ്തു.
രണ്ടാംവര്‍ഷ ബികോം വിദ്യാര്‍ത്ഥികളായ കെ.കെ.മുഹമ്മദ്, ദില്‍ഷാന്‍, അദില്‍, അതിനാല്‍ അബ്ദുള്ള, അന്‍സില്‍, ജാസിം, സമീഹ്, ജസീം എന്നിവരെയാണ് ഇന്ന് രാവിലെ ചേര്‍ന്ന മാനേജ്മെന്റിന്റെയും സ്റ്റാഫ് കൗണ്‍സിലിന്റെയും സംയുക്തയോഗം സസ്‌പെന്റ് ചെയ്യാന്‍ തീരുമാനിച്ചത്.
പിലാത്തറ ഭാരത് റോഡ് തഖ്വ മസ്ജിദിന് സമീപത്തെ മുഹമ്മദ് മുഹ്‌സിനാണ് (19) റാഗിങ്ങിനെ ചോദ്യം ചെയ്തതിന് മര്‍ദ്ദനത്തില്‍ പരിക്കേറ്റത്.
സംഭവത്തില്‍ എട്ട് രണ്ടാംവര്‍ഷ വിദ്യാര്‍ത്ഥികള്‍ക്കെതിരെ പരിയാരം പോലീസ് കേസെടുത്തിരുന്നു.
വെള്ളിയാഴ്ച്ച വൈകുന്നേരം 3.45 നായിരുന്നു സംഭവം. ഒന്നാം വര്‍ഷ വിദ്യാര്‍ത്ഥികള്‍ ഷൂസ് ധരിച്ച് വരരുതെന്ന് സീനിയര്‍ വിദ്യാര്‍ത്ഥികള്‍ നിര്‍ദ്ദേശിച്ചിരുന്നുവത്രേ.
ഇത് ലംഘിച്ച് ഷൂസിട്ട് വന്ന തന്നെ പ്രകോപിതരായി ഒരുസംഘം സീനിയര്‍ വിദ്യാര്‍ത്ഥികള്‍ നെഞ്ചത്ത് ചവിട്ടുകയും ക്രൂരമായി മര്‍ദ്ദിക്കുകയുമായിരുന്നുവെന്ന് മുഹമ്മദ് മുഹ്‌സിന്‍ പറഞ്ഞു.
കുറേ നാളുകളായി ഒന്നാംവര്‍ഷം വിദ്യാര്‍ത്ഥികളെ പലവിധത്തില്‍ പീഡിപ്പിക്കുകയായിരുന്നുവെന്ന് മുഹ്‌സിന്‍ പറഞ്ഞു.
ഒന്നാം വര്‍ഷം ബികോം ഫിനാന്‍സിന് പഠിക്കുകയാണ് മുഹ്‌സിന്‍. രണ്ടാം വര്‍ഷ വിദ്യാര്‍ത്ഥികളായ ഭയം കൊണ്ടാണ് വിവരം ആരോടും പറയാതിരുന്നതത്രേ.
പ്രശ്‌നം കോളേജ് മാനേജ്‌മെന്റ് അതീവഗൗരവത്തോടെയാണ് കാണുന്നതെന്നും കോളേജിലെ ആന്റി റാഗിങ്ങ് കൗണ്‍സില്‍ യോഗം ചേര്‍ന്ന് തുടര്‍ നടപടികള്‍ സ്വീകരിക്കുമെന്ന് വൈസ് പ്രിന്‍സിപ്പാളും കോളേജ് മാനേജരുമായ ഫാ.ജോണ്‍സണ്‍ പറഞ്ഞു.
പ്രിന്‍സിപ്പാള്‍ പ്രൊഫ.മുരളീധരന്റെ അധ്യക്ഷതയില്‍ ചേര്‍ന്ന യോഗം നടന്നത് റാഗിംഗ് തന്നെയെന്ന് വിലയിരുത്തുകയും മുഹ്‌സിന്‍ പ്രിന്‍സിപ്പാളിന് നല്‍കിയ പരാതി പോലീസിന് കൈമാറുകയും ചെയ്തിട്ടുണ്ട്.