എരമം-കുറ്റൂര്‍ പഞ്ചായത്തിലെ വെള്ളോറ ഗവ. ഹോമിയോ ഡിസ്‌പെന്‍സറിക്ക് എന്‍.എ.ബി.എച്ച് അംഗീകാരം
മാതമംഗലം: ആരോഗ്യ പരിരക്ഷയിലും ഡിസ്‌പെന്‍സറി നടത്തിപ്പിലും മികച്ച നിലവാരം പുലര്‍ത്തിയതിന് എരമം-കുറ്റൂര്‍ ഗ്രാമപഞ്ചായത്തിലെ വെള്ളോറ ഗവ.ഹോമിയോ ഡിസ്‌പെന്‍സറിക്ക് എന്‍.എ.ബി.എച്ച് അക്രഡിറ്റേഷന്‍ ലഭിച്ചു.
ആരോഗ്യമേഖലയിലെ മികച്ച സ്ഥാപനങ്ങള്‍ക്ക് അക്രഡിറ്റേഷന്‍ നല്‍കുന്ന ദേശീയ ഏജന്‍സിയാണ് എന്‍.എ.ബി.എച്ച്.
ഏറ്റവും മികവുറ്റ പ്രവര്‍ത്തനം കാഴ്ചവച്ചതിനാണ് വെള്ളോറ ഗവ. ഹോമിയോ ഡിസ്‌പെന്‍സറിക്ക് ഈ അംഗീകാരം ലഭ്യമായിരിക്കുന്നത്.
അടിസ്ഥാന സൗകര്യ വികസനം, രോഗി സൗഹൃദം, രോഗി സുരക്ഷ, അ ണുബാധ നിയന്ത്രണം എന്നിവ ഉള്‍പ്പെടെയുള്ള സേവന നിലവാരങ്ങളുടെ വിലയിരുത്തലുകളെ തുടര്‍ന്നാണ് അംഗീകാരം ലഭിച്ചത്.
കമ്മ്യൂണിറ്റി ഹെല്‍ത്ത് ഓഫീസര്‍ ഡോ. വിവേക്, പഞ്ചായത്ത് പ്രസിഡന്റ് ടി.ആര്‍.രാമചന്ദ്രന്‍, വൈസ് പ്രസിഡന്റ് ഷൈനി ബിജേഷ് ഉള്‍പ്പെടെയുള്ള തദ്ദേശ സ്വയംഭരണ പ്രതിനിധികളുടെ നേതൃത്വമാണ് ഈ നേട്ടത്തിന് ആശുപത്രിയെ സജ്ജമാക്കിയത്.
കേരള സര്‍ക്കാരിന്റെയും ദേശീയ ആയുഷ് മിഷന്‍ കേരളയുടെയും സഹകരണത്തോടെയാണ് പ്രവര്‍ത്തനങ്ങള്‍ നടന്നത്.
ആരോഗ്യ വകുപ്പ് മന്ത്രി വീണാ ജോര്‍ജില്‍ നിന്നും പഞ്ചായത്ത് ആരോഗ്യ സ്റ്റാന്റിങ്ങ് കമ്മറ്റി ചെയര്‍മാന്‍ എം.കെ.കരുണാകരന്‍, മെഡിക്കല്‍ ഓഫീസര്‍ ഡോ.വിവേക് എന്നിവര്‍ ചേര്‍ന്ന് സര്‍ട്ടിഫിക്കറ്റും ഫലകവും ഏറ്റുവാങ്ങി.