തമിഴ് നടന് വിജയകാന്ത് നിര്യാതനായി
ചെന്നൈ: നടനും ഡിഎംഡികെ സ്ഥാപക പ്രസിഡന്റുമായ വിജയകാന്ത് (71) നിര്യാതനായി.
കോവിഡ് ബാധിച്ചതിനെ തുടര്ന്ന് ഗുരുതരാവസ്ഥയിലായ താരം ആശുപത്രിയില് ചികിത്സയിലിരിക്കെയാണ് മരിച്ചത്.
ആരോഗ്യനില മോശമായതിനെ തുടര്ന്നാണ് താരത്തെ ആശുപത്രിയില് പ്രവേശിപ്പിച്ചത്.
പിന്നാലെയാണ് കോവിഡ് സ്ഥിരീകരിച്ചത്.
ശ്വാസം എടുക്കാന് ബുദ്ധിമുട്ടുള്ളതിനാല് വെന്റിലേറ്ററിലേക്ക് മാറ്റിയിരുന്നു.
ആരോഗ്യനില മോശമായതിനെത്തുടര്ന്ന് ചൊവ്വാഴ്ച രാത്രിയാണ് അദ്ദേഹത്തെ ഗിണ്ടിയിലെ സ്വകാര്യാശുപത്രിയില് പ്രവേശിപ്പിച്ചത്.
അനാരോഗ്യത്തെത്തുടര്ന്ന് നവംബര് 18-ന് വിജയകാന്തിനെ ആശുപത്രിയില് പ്രവേശിപ്പിച്ചിരുന്നു.
തുടര്ന്ന് അദ്ദേഹത്തിന്റെ ആരോഗ്യത്തേക്കുറിച്ച് അഭ്യൂഹങ്ങള് പരന്നതോടെ ആശുപത്രിയില് നിന്നുള്ള ചിത്രം കുടുംബം പങ്കുവെച്ചിരുന്നു.
ആശുപത്രി വിട്ട അദ്ദേഹം ഒരാഴ്ച്ചമുമ്പ് ചെന്നൈയില് നടന്ന ഡിഎംഡികെ ജനറല് കൗണ്സില് യോഗത്തില് പങ്കെടുത്തിരുന്നു.